|
Aboute mydnyght wente they to reste. Wel hath the myller vernysshed his heed, Ful pale he was for-dronken, and nat reed; He yoxeth, and he speketh thurgh the nose, As he were on the quakke or on the pose. To bed he goth, and with him goth his wyf, As eny jay sche light was and jolyf, So was hire joly whistel wel y-wet; The cradil at hire beddes feet is set, To rokken, and to yive the child to souke. And whan that dronken was al in the crouke, To bedde wente the doughter right anon; To bedde goth Aleyn, and also Jon, Ther nas no more, hem needed no dwale. This meller hath so wysly bibbed ale, That as an hors he snortith in his sleep, Ne of his tayl bihynd took he no keep. His wyf bar him a burdoun, a ful strong, Men might her rowtyng heeren a forlong. The wench routeth eek par companye. Aleyn the clerk, that herde this melodye, He pokyde Johan, and seyde, “Slepistow? Herdistow ever slik a sang er now? Lo, slik a couplyng is betwix hem alle, A wilde fyr upon thair bodyes falle! Wha herkned ever swilk a ferly thing? Ye, thei sul have the flour of ille endyng! This lange night ther tydes me na rest. But yet na fors, al sal be for the best. For, Johan,” sayd he, “as ever mot I thryve, If that I may, yone wenche sal I swyve. Som esement hath the lawe schapen us; For Johan, ther is a lawe that says thus, That if a man in a point he agreved, That in another he sal be releeved. Oure corn is stoln, sothly, it is na nay, And we have had an ylle fitt to day; And syn I sal have nan amendement Agayn my los, I wol have esement. By Goddes saule! it sal nan other be.” This Johan answerd, “Aleyn, avyse the; The miller is a perlous man,” he sayde, “And if that he out of his sleep abrayde, He mighte do us bothe a vilonye.” Aleyn answerd, “I count it nat a flye!” And up he roos, and by the wenche he crepte. This wenche lay upright and faste slepte, Til he so neih was or sche might aspye That it hadde ben to late for to crye. And schortly for to seye, they weren at oon. Now pley, Alein, for I wol speke of Jon. This Johan lith stille a forlong whyle or two, And to himself compleyned of his woo. “Allas!” quod he, “this is a wikked jape; Now may I say that I am but an ape. Yet hath my felaw somwhat for his harm; He hath the myllers doughter in his arm; He auntred him, and has his needes sped, And I lye as a draf-sak in my bed; And when this jape is tald another day, I sal be held a daf, a cokenay. Unhardy is unsely, as men saith. I wol arise, and auntre it, in good faith.” And up he ros, and softely he wente Unto the cradil, and in his hand it hente, And bar it softe unto his beddis feet. Soone after this the wyf hir routyng leet, And gan awake, and went hir for to pisse, And cam agayn, and gan hir cradel mysse, And groped heer and ther, but sche fond noon. “Allas!” quod sche, “I had almost mysgoon; I had almost goon to the clerkes bed, Ey, benedicite! than had I foule i-sped!” And forth sche goth, til sche the cradil fand. Sche gropith alway forther with hir hand, And fand the bed, and thoughte nat but good, Bycause that the cradil by hit stood, Nat knowyng wher sche was, for it was derk; But faire and wel sche creep in to the clerk, And lith ful stille, and wolde han caught a sleep. Withinne a while Johan the clerk up leep, And on this goode wyf he leyth on sore; So mery a fytt ne hadde sche nat ful yore. He priketh harde and deepe, as he were mad. This joly lyf han this twey clerkes had, Til that the thridde cok bygan to synge. Aleyn wax wery in the dawenynge, For he hadde swonken al the longe night, And seyde, “Farwel, Malyn, my sweete wight! The day is come, I may no lenger byde; But evermo, wher so I go or ryde, I am thin owen clerk, so have I seel!” “Now, deere lemman,” quod sche, “go, farwel! But or thou go, o thing I wol the telle: Whan that thou wendist hom-ward by the melle, Right at the entré of the dore byhynde Thou schalt a cake of half a busshel fynde, That was i-maked of thyn owen mele, Which thatI hilp myn owen self to stele. And, goode lemman, God the save and kepe!” And with that word almost sche gan to weepe.
Aleyn uprist, and thought, “Er that it dawe I wol go crepen in by my felawe;” And fand the cradil with his hand anon. “By God!” thought he, “al wrong I have i-goon; My heed is toty of my swynk to nyght, That makes me that I ga nought aright. I wot wel by the cradel I have mysgo; Heer lith the myller and his wyf also.” Forth he goth in twenty devel way Unto the bed, ther as the miller lay. He wende have crope by his felaw Jon, And by the myller in he creep anon, And caught him by the nekke, and soft he spak, And seyde, “Jon, thou swyneshed, awak, For Cristes sowle! and here a noble game; For, by that lord that cleped is seynt Jame, As I have thries in this schorte night Swyved the myllers doughter bolt upright, Whiles thou hast as a coward ben agast.” “Ye, false harlot,” quod this mellere, “hast? A! false traitour, false clerk!” quod he, “Thou schalt be deed, by Goddes dignité! Who durste be so bold to disparage My doughter, that is com of hih lynage?” And by the throte-bolle he caught Aleyn, And he hent him dispitiously ageyn, And on the nose he smot him with his fest. Doun ran the blody streem upon his brest; And in the floor with nose and mouth to-broke They walweden as pigges in a poke; And up they goon, and doun they goon anon, Til that the millner stumbled at a ston, And doun he felle bakward on his wyf, That wyste nothing of this nyce stryf; For sche was falle asleepe a litel wight With Jon the clerk, that waked al the night, And with the falle right out of slepe sche brayde. “Help, holy croys of Bromholme!” sche sayde, “In manus tuas, Lord, to the I calle! Awake, Symond, the feend is in thin halle! My hert is broken! help! I am but deed! Ther lythe upon my wombe and on myn heed. Help, Symkyn! for this false clerkes fighte.” This Johan stert up as fast as ever he mighte, And graspede by the walles to and fro, To fynde a staf; and sche sturt up also, And knewe the estres bet than dede that Jon. And by the wal sche took a staf anon, And sawh a litel glymeryng of light; For at an hool in schon the moone bright, And by that light she saugh hem bothe two; But sikirly sche wiste nat who was who, But as sche saugh a whit thing in hir ye. And whan sche gan this white thing aspye, Sche wende the clerk hadde wered a volupeer; And with a staf sche drough hir neer and neer, And wend have hit this Aleyn atte fulle, And smot this meller on the piled sculle, That doun he goth, and cryeth, “Harrow! I dye!” This clerkes beeten him wel, and lett hym lye, And greyth hem wel, and take her hors anon, And eek here mele, and hoom anon they goon; And at the millen dore they tok here cake Of half a buisshel flour ful wel i-bake.
Thus is the prowde miller wel i-bete, And hath i-lost the gryndyng of the whete, And payed for the soper every del Of Aleyn and of Johan, that beten him wel; His wyf is swyved, and his doughter als. Lo! such it is a miller to be fals. And therto this proverbe is seyd ful soth, He thar nat weene wel that evyl doth. A gylour schal himself bygiled be. And God, that sittest in thy magesté, Save al this compaignie, gret and smale! Thus have I quyt the miller in his tale.
|